पुणे : सावित्रीबाई फुले पुणे विद्यापीठातील (SPPU) विद्यार्थ्यांच्या मेसमधील अन्नाच्या गुणवत्तेचा प्रश्न पुन्हा ऐरणीवर आला आहे. मुलींच्या वसतिगृहातील मेसमध्ये अन्नपदार्थांमध्ये झुरळ, किडे आणि प्लास्टिकचे तुकडे आढळल्याच्या तक्रारीनंतर अन्न व औषध प्रशासनाने (FDA) मंगळवारी मेसची तपासणी केली. विशेष म्हणजे, विद्यापीठातील मेसच्या अन्न गुणवत्तेबाबत FDA कडून यापूर्वीही कारवाई करण्यात आली होती.
गेल्या काही दिवसांपासून विद्यापीठातील मेसच्या अन्नाच्या गुणवत्तेबाबत विद्यार्थ्यांकडून तक्रारी करण्यात येत आहेत. २ ऑक्टोबर रोजी नाश्त्यातील पोह्यामध्ये किडा आढळल्याचा आरोप विद्यार्थ्यांनी केला. त्यानंतर ३ ऑक्टोबरलाही पुन्हा पोह्यामध्ये किडा आढळल्याची तक्रार करण्यात आली. तसेच सप्टेंबरच्या अखेरीस भाजीमध्ये प्लास्टिकचे तुकडे आढळल्याचेही विद्यार्थ्यांचे म्हणणे आहे.
या घटनांमुळे विद्यार्थ्यांमध्ये नाराजी निर्माण झाली असून, मेसमधील अन्नाच्या गुणवत्तेवर आणि विद्यापीठाच्या अन्न गुणवत्ता नियंत्रण यंत्रणेवर प्रश्नचिन्ह उपस्थित करण्यात येत आहे. विद्यार्थ्यांनी या प्रकरणाची गंभीर दखल घेऊन संबंधित मेसचालकावर कठोर कारवाई करण्याची मागणी केली आहे.
दरम्यान, विद्यार्थ्यांच्या तक्रारी आणि या घटनांची माहिती समोर आल्यानंतर FDAच्या पथकाने विद्यापीठातील मुलींच्या वसतिगृहातील मेसची प्रत्यक्ष पाहणी केली. या तपासणीत अन्न सुरक्षा आणि स्वच्छतेसंदर्भात कोणत्या बाबी आढळल्या, तसेच पुढील कारवाई काय होणार, याकडे आता विद्यार्थ्यांचे लक्ष लागले आहे.
यापूर्वी जून २०२६ मध्येही SPPUच्या रिफेक्टरी मेसची FDAने तपासणी केली होती. त्या वेळी अन्न साठवणूक, स्वच्छता, कीटक नियंत्रण, अन्न हाताळणी आणि कर्मचाऱ्यांच्या वैद्यकीय नोंदींसह विविध बाबींमध्ये त्रुटी आढळल्यानंतर मेसचा परवाना निलंबित करण्यात आला होता.
वारंवार अन्नाच्या गुणवत्तेबाबत तक्रारी समोर येत असल्याने विद्यार्थ्यांना सुरक्षित आणि दर्जेदार अन्न मिळावे यासाठी विद्यापीठ प्रशासनाने ठोस उपाययोजना करण्याची गरज व्यक्त केली जात आहे.
