पुण्यात एम.डी. ड्रग्सविरोधात पोलिसांची मोठी कारवाई; ४.१४ लाखांचा मुद्देमाल जप्त
काळेपडळ परिसरात ग्राहकाच्या शोधात असलेले दोन संशयित ताब्यात; १११.४४ ग्रॅम एम.डी. ड्रग्स हस्तगत
पुणे : पुणे शहरात अंमली पदार्थांच्या अवैध विक्रीविरोधात पोलिसांनी कारवाईचा बडगा उगारला आहे. काळेपडळ पोलीस ठाण्याच्या हद्दीत अंमली पदार्थविरोधी पथक क्रमांक १ ने कारवाई करत एम.डी. (मेफेड्रोन) या अंमली पदार्थाची विक्री करण्यासाठी ग्राहकाच्या शोधात असलेल्या दोन संशयितांना ताब्यात घेतले.
या कारवाईत पोलिसांनी अंदाजे ३ लाख ४० हजार रुपये किमतीचे १११.४४ ग्रॅम एम.डी. ड्रग्स जप्त केले. तसेच दोन मोबाईल फोन आणि एक मोटारसायकल असा एकूण ४ लाख १४ हजार ३२० रुपये किमतीचा मुद्देमाल पोलिसांनी हस्तगत केला आहे.
पोलिसांनी दिलेल्या माहितीनुसार, काळेपडळ परिसरातील समृद्धी चौकाजवळ रेल्वे मार्गालगत संशयित दोघे थांबले असल्याची माहिती अंमली पदार्थविरोधी पथकाला मिळाली होती. त्यानुसार पोलिसांनी सापळा रचून दोघांना ताब्यात घेतले. झडतीदरम्यान त्यांच्याकडे एम.डी. ड्रग्स आढळून आले.
ताब्यात घेतलेल्या संशयितांची नावे मुशरफ इसाक शेख (वय २५) आणि सोहेल बाबूराव शेख (वय २५) अशी असून, दोघेही काळेपडळ परिसरातील रहिवासी आहेत. या प्रकरणी काळेपडळ पोलीस ठाण्यात एनडीपीएस कायद्यान्वये गुन्हा दाखल करण्यात आल्याचे वृत्त आहे.
एम.डी. ड्रग्सचा पुरवठा नेमका कोठून झाला होता आणि त्याची विक्री कोणाला केली जाणार होती, याचा तपास पोलीस करत आहेत.
पुणे शहरात अंमली पदार्थांची विक्री आणि तस्करी रोखण्यासाठी पोलिसांकडून विशेष मोहीम राबवली जात असून, या कारवाईमुळे अंमली पदार्थ विक्रेत्यांमध्ये खळबळ उडाली आहे.
