शिवाजीनगर चौकात पीएमपीएमएल बसला आग; अग्निशामकाच्या सतर्कतेमुळे मोठा अनर्थ टळला. बसच्या मागील बाजूने मोठ्या प्रमाणात धूर येत असल्याचे लक्षात येताच चालकाला दिली माहिती; सर्व प्रवाशांना सुखरूप बाहेर काढले.

पुणे, दि. १८ सप्टेंबर २०२६ : शिवाजीनगर चौकात पीएमपीएमएल बसच्या मागील बाजूने मोठ्या प्रमाणात धूर येत असल्याचे लक्षात येताच कसबा अग्निशमन केंद्रातील अग्निशामकाने तातडीने चालकाला माहिती दिल्याने संभाव्य मोठा अनर्थ टळला. घटनेची माहिती मिळताच अग्निशमन दलाच्या जवानांनी घटनास्थळी धाव घेत आग आटोक्यात आणली. बसमधील सर्व प्रवाशांना सुरक्षितपणे बाहेर काढण्यात आले.

मिळालेल्या माहितीनुसार, कसबा अग्निशमन केंद्रात कार्यरत अग्निशामक सुरेश पवार हे रात्रीची ड्युटी पूर्ण करून दुचाकीवरून कळेवाडीच्या दिशेने घरी जात होते. त्यावेळी शिवाजीनगर चौकातून पुणे स्टेशनकडून निगडीच्या दिशेने जाणाऱ्या पीएमपीएमएल बसच्या मागील बाजूने मोठ्या प्रमाणात धूर येत असल्याचे त्यांच्या निदर्शनास आले.

पवार यांनी प्रसंगावधान राखत तातडीने बसच्या चालकाला याबाबत माहिती दिली. चालकाने तत्काळ बस थांबवली. त्यानंतर पवार यांनी अग्निशमन दलाच्या नियंत्रण कक्षालाही घटनेची माहिती दिली.

सर्व प्रवाशांना सुरक्षित बाहेर काढले

कसबा अग्निशमन केंद्राचे अग्निशमन वाहन घटनास्थळी पोहोचेपर्यंत बसचा चालक, वाहक आणि अग्निशामक सुरेश पवार यांच्या मदतीने बसमधील सर्व प्रवाशांना सुरक्षितपणे खाली उतरविण्यात आले.

घटनास्थळी पोहोचल्यानंतर अग्निशमन दलाच्या जवानांनी पाण्याचा वापर करून आग नियंत्रणात आणली आणि परिस्थिती पूर्णपणे नियंत्रणात आणली.

प्रसंगावधानामुळे मोठा धोका टळला

सुरेश पवार यांनी वेळेत धूर ओळखून चालकाला सावध केल्याने प्रवाशांना वेळीच बसमधून बाहेर काढणे शक्य झाले. त्यांच्या सतर्कतेसोबतच चालक आणि वाहकाने केलेल्या तातडीच्या उपाययोजनांमुळे संभाव्य मोठी दुर्घटना टळल्याचे अग्निशमन दलाकडून सांगण्यात आले.

या घटनेनंतर प्रवाशांनीही अग्निशामक, बसचालक, वाहक आणि अग्निशमन दलाच्या तातडीच्या प्रतिसादाचे कौतुक केले.