१८ ते २५ सप्टेंबरदरम्यान सायंकाळी ५ नंतर निर्बंध; देखावे पाहण्यासाठी येणाऱ्या नागरिकांनी पर्यायी मार्गांचा वापर करण्याचे आवाहन
पुणे, दि. १७ सप्टेंबर २०२६ : गणेशोत्सवातील देखावे आणि आकर्षक रोषणाई पाहण्यासाठी पुण्याच्या मध्यवर्ती भागात होणारी गर्दी लक्षात घेता पुणे शहर वाहतूक पोलिसांनी वाहतुकीत मोठे बदल जाहीर केले आहेत. १८ ते २५ सप्टेंबरदरम्यान दररोज सायंकाळी ५ वाजल्यापासून गर्दी संपेपर्यंत मध्यवर्ती भागातील अनेक प्रमुख रस्त्यांवर सर्वसामान्य वाहनांना प्रवेश बंद करण्यात येणार आहे. या निर्बंधांमधून अग्निशमन दल, पोलीस, रुग्णवाहिका आणि इतर अत्यावश्यक सेवेतील वाहनांना सूट राहणार आहे.
गणेशोत्सवाच्या काळात पुण्यातील मध्यवर्ती भागात मोठ्या प्रमाणात भाविक आणि नागरिक देखावे पाहण्यासाठी येतात. त्यामुळे पादचारी आणि वाहनांची वाढणारी गर्दी लक्षात घेऊन वाहतूक कोंडी टाळण्यासाठी हे नियोजन करण्यात आले आहे. प्रत्यक्ष गर्दीची परिस्थिती पाहून काही मार्ग बंद किंवा खुले करण्याचा निर्णय वाहतूक पोलिसांकडून घेतला जाऊ शकतो.
१८ सप्टेंबरपासून दोन प्रमुख मार्गांवर वाहनबंदी
लक्ष्मी रोड : हमजेखान चौक ते सेवासदन चौक या मार्गावर १८ सप्टेंबरपासून वाहनांना प्रवेश बंद राहणार आहे. वाहनचालकांनी डुल्या मारुती चौक तसेच महाराणा प्रताप रोड–घोरपडे पेठ–शंकरशेठ रोड या पर्यायी मार्गांचा वापर करावा.
शिवाजी रोड : गाडगीळ पुतळा ते रामेश्वर चौक या मार्गावरही वाहनांना प्रवेशबंदी राहणार आहे.
शिवाजीनगरहून स्वारगेटच्या दिशेने जाणाऱ्या वाहनांसाठी एस. जी. बर्वे चौक–जंगली महाराज रोड–अलका चौक–टिळक रोड किंवा शास्त्री रोड हा पर्यायी मार्ग सुचविण्यात आला आहे. तसेच सिमला चौक–कामगार पुतळा–शाहीर अमर शेख चौक–नेहरू रोड या मार्गाचाही वापर करता येणार आहे.
१८ ते २५ सप्टेंबरदरम्यान सायंकाळी ५ नंतर प्रमुख मार्ग बंद
गर्दीच्या परिस्थितीनुसार खालील मार्गांवर सर्वसामान्य वाहनांना प्रवेश बंद करण्यात येणार आहे :
लक्ष्मी रोड : सेवासदन चौक ते टिळक चौक
शिवाजी रोड : रामेश्वर चौक ते जेधे चौक
बाजीराव रोड : पूरम चौक ते अप्पा बळवंत चौक
सिंहगड गॅरेज, घोरपडे पेठ ते राष्ट्रभूषण चौक–हिराबाग चौक
दिनकर जावळकर पथ ते पायगुडे चौक–हिराबाग चौक
कै. अनंत बाळकृष्ण नाईक पथ ते टिळक रोड
सणस रोड : गोटीराम भैय्या चौक ते गोविंद हलवाई चौक
पानघंटी चौक ते गंज पेठ पोलीस चौकी
गंज पेठ चौक ते वीर लहुजी वस्ताद तालीम
गावकसाब मशिद ते सेंट्रल स्ट्रीट पोलीस चौकी
कोहिनूर चौक ते बाबाजान चौक
जेधे प्रसाद रोड/सुभानशहा रोड परिसरातील पार्श्वनाथ चौक ते शास्त्री चौक आणि सुभानशहा दर्गा ते सोन्या मारुती चौक
गुरुनानक पथ–हमजेखान चौक–देवजीबाबा चौक परिसरातही परिस्थितीनुसार वाहतूक नियमन केले जाणार आहे.
पर्यायी मार्गांचा वापर करण्याचे आवाहन
वाहतूक पोलिसांनी नागरिकांना टिळक रोड, केळकर रोड, महाराणा प्रताप रोड, शंकरशेठ रोड, नेहरू रोड, सेंट्रल स्ट्रीट, भगवान महावीर चौक आणि सरबतवाला चौक आदी उपलब्ध पर्यायी मार्गांचा वापर करण्याचे आवाहन केले आहे.
मात्र काही अरुंद अंतर्गत रस्त्यांना पर्यायी मार्ग उपलब्ध नसल्याने त्या ठिकाणी वाहनचालकांनी वाहतूक पोलिसांच्या सूचनांचे पालन करणे आवश्यक राहणार आहे.
पूरम चौक परिसरात वाहतुकीत तात्पुरता बदल
वाहतूक कोंडी कमी करण्यासाठी टेलिफोन भवन ते पूरम चौक या परिसरातील एकेरी वाहतूक व्यवस्थेत आवश्यकतेनुसार तात्पुरता बदल करून दुहेरी वाहतूक सुरू केली जाऊ शकते. त्यामुळे या परिसरातून प्रवास करणाऱ्या वाहनचालकांनी प्रत्यक्ष ठिकाणी तैनात वाहतूक पोलिसांच्या सूचनांचे पालन करावे.
मध्यवर्ती भागात पार्किंगला निर्बंध
गणेशोत्सवाच्या गर्दीच्या काळात शिवाजी रोड, मंडई, शनिपार, बाजीराव रोड, अप्पा बळवंत चौक आणि बुधवार चौक परिसरात पार्किंगवर निर्बंध राहणार आहेत. वाहतूक पोलिसांनी नागरिकांनी शक्यतो मध्यवर्ती भागात खासगी वाहने आणणे टाळावे आणि उपलब्ध सार्वजनिक वाहतूक व्यवस्था तसेच नियोजित पार्किंगचा वापर करावा, असे आवाहन केले आहे.
गर्दीनुसार निर्णय बदलण्याचे अधिकार वाहतूक पोलिसांकडे
वाहतूक शाखेचे पोलीस उपायुक्त डॉ. संदीप भाजीभाकरे यांनी नागरिकांनी वाहतूक पोलिसांना सहकार्य करण्याचे आवाहन केले आहे. प्रत्यक्ष गर्दी आणि वाहतुकीची परिस्थिती पाहून काही रस्ते तात्पुरते बंद करणे, खुले करणे किंवा वाहतूक अन्य मार्गाने वळविण्याचा निर्णय घेतला जाऊ शकतो.
त्यामुळे गणेशोत्सवातील देखावे पाहण्यासाठी मध्यवर्ती पुण्यात जाणाऱ्या नागरिकांनी घराबाहेर पडण्यापूर्वी वाहतूक बदल, पर्यायी मार्ग आणि पार्किंग निर्बंध लक्षात घेऊन प्रवासाचे नियोजन करावे.
