हिंजवडी–शिवाजीनगर मेट्रोच्या कामाच्या दर्जावर प्रश्नचिन्ह; पहिल्याच पावसात छतातून पाणी झिरपल्याचे दृश्य समोर, उद्घाटनाच्या घाईत दर्जाकडे दुर्लक्ष झाले का?
पुणे : पुणेकरांना वाहतूक कोंडीतून दिलासा देण्याचे आश्वासन देणाऱ्या हिंजवडी–शिवाजीनगर मेट्रो प्रकल्पाच्या उद्घाटनापूर्वीच माण (Maan) मेट्रो स्थानकातील पावसाच्या पाण्याच्या गळतीचा प्रकार समोर आला आहे. ३ नोव्हेंबर रोजी होणाऱ्या उद्घाटनाची जय्यत तयारी सुरू असतानाच स्थानकाच्या छतातून पाणी थेट आत झिरपत असल्याचे दिसून आले आहे. त्यामुळे हजारो कोटींच्या या महत्त्वाकांक्षी प्रकल्पाच्या बांधकामाच्या दर्जाबाबत गंभीर प्रश्न उपस्थित झाले आहेत.
एकीकडे आधुनिक तंत्रज्ञान, अत्याधुनिक सुविधा आणि जागतिक दर्जाच्या मेट्रो सेवेचे दावे केले जात आहेत; तर दुसरीकडे स्थानकाच्या छतातून पावसाचे पाणी गळत असल्याचे चित्र समोर येत आहे. प्रवाशांसाठी उभारण्यात आलेल्या स्थानकात उद्घाटनापूर्वीच पाणी झिरपत असेल, तर प्रत्यक्ष मेट्रो सेवा सुरू झाल्यानंतर देखभाल आणि सुरक्षिततेची काय परिस्थिती असेल, असा सवाल उपस्थित होत आहे.
मेट्रो स्थानकाचे छत पावसापासून संरक्षण करण्यासाठी सक्षम असणे अपेक्षित असताना जलरोधक यंत्रणेतील त्रुटी नेमक्या कुठे राहिल्या? बांधकाम पूर्ण करताना गुणवत्ता तपासणी झाली होती का? संबंधित कंत्राटदार आणि देखरेख करणाऱ्या यंत्रणांनी कामाची योग्य पाहणी केली होती का? असे अनेक प्रश्न या निमित्ताने पुढे आले आहेत.
विशेष म्हणजे, उद्घाटनाच्या निमित्ताने स्थानकाचे सुशोभीकरण आणि अंतिम तयारी सुरू असताना अशा प्रकारची गळती समोर येणे ही संबंधित यंत्रणांसाठी चिंतेची बाब आहे. केवळ उद्घाटनाची तारीख गाठणे महत्त्वाचे की प्रवाशांना सुरक्षित आणि दर्जेदार सुविधा देणेही तितकेच महत्त्वाचे, असा प्रश्न आता उपस्थित होत आहे.
उद्घाटनापूर्वीच समोर आलेल्या या प्रकाराची पीएमआरडीए आणि संबंधित प्रकल्प यंत्रणांनी तातडीने दखल घेऊन गळतीचे कारण स्पष्ट करावे. केवळ वरवरची डागडुजी न करता कायमस्वरूपी दुरुस्ती करावी आणि बांधकामाच्या गुणवत्तेची स्वतंत्र तपासणी करावी, अशी अपेक्षा व्यक्त होत आहे. अन्यथा, ‘हायटेक मेट्रो’च्या दाव्यांपेक्षा स्थानकातील गळतीच चर्चेचा विषय ठरण्याची शक्यता आहे.
